- २७ भाद्र २०८३, शनिबार / Sep 12, 2026
दूध अभावका कारण चितवन मिल्क उद्योग तीन महिनादेखि बन्द ।
वैशाखदेखि पाउडर दूध र नौनी उत्पादन पूर्ण रूपमा ठप्प ।
उद्योगमा एक हजार बोरा पाउडर दूध मात्र मौज्दात ।
भारतमा दूधको माग बढेपछि नेपालमा प्रशोधनका लागि दूध अभाव ।
उद्योगले भदौदेखि दूध आपूर्ति बढ्ने अपेक्षा गरेको छ ।
भरतपुर, १० साउन । दूधको अभाव भएपछि चितवन मिल्क उद्योग विगत तीन महिनादेखि बन्द भएको छ । डेरी तथा सहकारी संस्थाबाट संकलित दूध प्रशोधन गरी पाउडर दूध र नौनी उत्पादन गर्दै आएको उद्योगमा कच्चा पदार्थको अभाव भएपछि उत्पादन पूर्ण रूपमा रोकिएको हो ।
उद्योगका प्रबन्धक दुर्गा पराजुली का अनुसार विगतका वर्षमा असार र साउन महिनामा मात्र दूध अभाव हुने गरे पनि यस वर्ष वैशाखदेखि नै उद्योग बन्द हुन पुगेको छ । उद्योगमा डेरी र सहकारीहरूले भण्डारण गरेको नौनी लगभग सकिएको छ भने पाउडर दूध करिब एक हजार बोरा मात्र मौज्दात रहेको उनले बताए ।
गत वर्षहरूमा यही समयमा उद्योगमा करिब ५०० टन नौनी र ६ हजार बोरा पाउडर दूध मौज्दात रहने गरेको थियो । चितवन, मकवानपुर, नवलपरासी र रूपन्देहीलगायत जिल्लाबाट दूध संकलन हुने गरेको उद्योग हाल दूध आपूर्ति बढ्ने प्रतीक्षामा रहेको छ ।
भरतपुर महानगरपालिका–१ ठिमुरामा रहेको उद्योगले २०७५ सालदेखि डेरी र सहकारीको दूध प्रशोधन गर्दै आएको छ । उद्योगले प्रतिलिटर पाउडर दूध प्रशोधनमा ११३ रुपैयाँ तथा घ्यू (बटर) प्रशोधनमा प्रतिकिलो ५५ रुपैयाँ शुल्क लिँदै आएको छ । उद्योगमा हाल ३३ जना कर्मचारी कार्यरत छन् ।
२०६४ सालमा स्थापना भएको यो उद्योग २०७२ सालको भूकम्पपछि केही समय बन्द भएको थियो । त्यसअघि उद्योगले आफैँ दूध खरिद गरी प्रशोधन गरेर बजारमा बिक्री गर्ने गरेको थियो ।
जिल्ला दुग्ध उत्पादक सहकारी सङ्घ चितवनका अध्यक्ष किशोर बगाले का अनुसार भारतीय सीमा क्षेत्रमा दूधको माग बढेपछि नेपालबाट दूध भारततर्फ जान थालेको छ ।
भारतमा दूधको अभाव रहेकाले नेपाली दूधले राम्रो बजार र मूल्य पाएको छ । त्यसकै प्रभावले स्वदेशी प्रशोधन उद्योगहरूमा दूधको अभाव सिर्जना भएको उनले बताए ।
