काठमाण्डौ, ३१ असाेज । काठमाण्डौ उपत्यकामा गाडीबाट हुने ध्वनि प्रदूषण नियन्त्रण गर्न उपत्यका ट्राफिक प्रहरीले विशेष अभियान सुरु गरेको छ । चर्को आवाजमा हर्न बजाउने र मोटरसाइकलमा गैरकानूनी रूपमा परिमार्जन गरिएको साइलेन्सर प्रयोग गर्ने सवारीसाधनका कारण बढ्दो ध्वनि प्रदूषणमाथि कडाइ गर्न अभियान सञ्चालन गरिएको हो ।

उपत्यका ट्राफिक प्रहरी कार्यालयका अनुसार पछिल्ला केही दिनयता काठमाण्डौ, ललितपुर र भक्तपुरसहितका विभिन्न स्थानमा स्वरूप परिवर्तन गरी ठूलो आवाज निकाल्ने कम्तीमा २०० भन्दा बढी मोटरसाइकल नियन्त्रणमा लिइएका छन् ।

ठूलो आवाज निकाल्ने मोटरसाइकलहरूलाई नियन्त्रणमा लिएर आवश्यक कानूनी प्रक्रिया अघि बढाइएको उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक (एसएसपी) नवराज अधिकारीले जानकारी दिनुभयो । उहाँका अनुसार यो अभियान निरन्तर रूपमा सञ्चालन गरिनेछ र नियम उल्लङ्घन गर्ने सवारीसाधनलाई कुनै पनि किसिमको छुट दिइने छैन ।

ट्राफिक प्रहरीले सवारीधनीहरूलाई सवारी साधनको मर्मत, हर्नको प्रयोग र साइलेन्सर प्रणालीमा ध्यान दिन आग्रह गरेको छ । ध्वनि प्रदूषणका कारण जनस्वास्थ्यमा नकारात्मक असर पर्ने भएकाले ट्राफिक प्रहरीले यसको नियन्त्रणलाई प्राथमिकतामा राखेको जनाएको छ ।

काठमाडौँ, २७ चैत । टिकटकले ‘टिकटक फोर आर्टिस्ट्स’ नामको नयाँ प्लेटफर्म सुरु गरेको छ। यो प्लेटफर्मले कलाकारहरूलाई आफ्नो करियर निर्माणमा सघाउने लक्ष्य राखेको छ। कलाकारहरूलाई आफ्ना गीतहरूको प्रचार गर्ने र श्रोताहरूसँग गहिरो सम्बन्ध बनाउने उपकरणहरू यो प्लेटफर्मले उपलब्ध गराउँछ।

‘टिकटक फोर आर्टिस्ट्स’ मार्फत कलाकारहरूले विभिन्न अभियानहरू सञ्चालन गर्न सक्छन्। जस्तै आफ्ना आगामी रचनाहरूको प्रचार गर्ने। यो सुविधाले उनीहरूलाई गीतको प्री–आर्डर प्रवर्द्वन गर्न र सामाजिक सञ्जालमा आफ्नो उपस्थिति बलियो बनाउन अभियान चलाउन सहयोग गर्छ।

यसका साथै, कलाकारहरूले आफ्ना पोस्ट र गीतहरूको प्रदर्शनको डेटा पनि प्राप्त गर्न सक्छन्। यो डेटाले उनीहरूलाई आफ्नो रणनीति सुधार्न र श्रोतासँग थप प्रभावकारी रूपमा जोडिन मद्दत गर्नेछ। अहिले यो प्लेटफर्म अष्ट्रेलिया, न्युजील्याण्ड, जापान, दक्षिण कोरिया र इन्डोनेशियामा परीक्षणको चरणमा छ। टिकटकले भविष्यमा यो सुविधालाई थप बजारहरूमा विस्तार गर्ने योजना बनाएको छ। विश्वभरका कलाकारहरूलाई उपलब्ध गराउने तयारी पनि भइरहेको छ।