एजेन्सी, २ पुष ।  अमेरिकी राष्ट्रपति डोनाल्ड ट्रम्पले भेनेजुएलाबाट आउने र त्यहाँबाट जाने सबै प्रतिबन्धित तेल ट्यांकरमाथि पूर्ण रूपमा नाकाबन्दी लगाउन आदेश दिनुभएको छ।

राष्ट्रपति ट्रम्पले आफ्नो सामाजिक सञ्जाल ‘ट्रुथ सोसल’ मा लेख्दै भेनेजुएला आतंकवाद, लागूऔषध तस्करी र मानव तस्करीजस्ता आपराधिक गतिविधिमा संलग्न रहेको आरोप लगाउँदै यस्तो आदेश जारी गर्नुभएको हो।

यसअघि एक हप्ता अगाडि अमेरिकाले भेनेजुएलाको तट नजिकै एउटा तेल ट्यांकर नियन्त्रणमा लिएको थियो। उक्त कदमलाई भेनेजुएलाका राष्ट्रपति निकोलस मादुरोले ‘समुद्री लुटपाट’ को संज्ञा दिएका थिए।

ट्रम्पको नयाँ आदेशपछि अन्तर्राष्ट्रिय बजारमा कच्चा तेलको मूल्यमा ठूलो उतार–चढाव आउन सक्ने अनुमान गरिएको बीबीसीले जनाएको छ। यसैबीच अमेरिकाले क्यारेबियन क्षेत्रमा आफ्नो सैन्य उपस्थिति थप सुदृढ गरेको छ।

उक्त क्षेत्रमा परमाणु ऊर्जाबाट सञ्चालन हुने पनडुब्बी, जासुसी विमान तथा करिब १५ हजार सैनिक तैनाथ गरिएको जनाइएको छ।

अमेरिकाले सो क्षेत्रमा रहेका केही डुंगामाथि आक्रमणसमेत गरेको बताइएको छ, जसमा हालसम्म ८० भन्दा बढी व्यक्तिको मृत्यु भएको खबरमा उल्लेख छ।