चिसोबाट जोगाउन नसके त्रिपालमुनि बसेका धेरैको ज्यान जानसक्ने चेतावनी

काठमाडौं । राष्ट्रिय मानव अधिकार आयोगले जाजरकोट र रुकुम पश्चिमका भूकम्पपीडितलाई तत्काल चिसोबाट जोगाउने व्यवस्था मिलाउन कर्णाली प्रदेश सरकारलाई आग्रह गरेको छ ।
त्रिपालमुनि बसिरहेका दीर्घरोगी, सुत्केरी, गर्भवती, महिला, वृद्धवृद्धा तथा बिरामीलाई दाउरा, न्यानो कपडा, औषधिको आवश्यक देखिएको आयोगले ठहर गरेको हो ।

जाजरकोट जिल्ला अस्पतालमा आवश्यक जनशक्ति र औषधिको पनि अभाव रहेकाले औषधी उपलब्ध गराउँन समेत आयोगले आग्रह गरेको छ । केही पालिकामा अझै सरकारले घोषणा गरेको अस्थायी घर बनाउनका लागि पहिलो किस्ताको रकम पनि नपुगेको आयोगले जनाएको छ ।

त्रिपालमुनि बसेका ४३ जनाको मृत्यु भइसकेको जाजरकोट र रुकुम पश्चिममा तत्काल चिसोबाट जोगाउन नसकिए त्रिपालमुनि बसेका धेरैको ज्यान जानसक्ने देखिन्छ ।