चीनमा संक्रमण घट्यो, १०३ देशमा फैलियो कोरोना

काठमाडौं । कोरोना भाइरसको संक्रमण १ सय तीन देशमा फैलिएको विश्व स्वास्थ्य संगठनले जनाएको छ। चीनमा संक्रमितको संख्या घट्दै गएको छ भने इरान र इटालीमा तीब्ररुपमा फैलिदै गएको छ । इटालीमा ५ हजार ८ सय ८३ जनामा सक्रमण भेटिएको छ भने शनिबार मात्रै थप ३६ जनाको मृत्यु भएको छ ।

इरानमा १४५ जनाको ज्यान गएको छ भने ५ हजार ८ सय २३ जनामा संक्रमण देखिएको छ। दक्षिण कोरियामा ५० जनाको ज्यान गएको छ भने सात हजार १ सय २४ जनामा संक्रमण फैलिएको छ । फ्रान्स जर्मनी, स्पेन, बेलायत बेल्जियममा पनि यसको संक्रमण तीब्र रुपमा फैलिरेहको छ ।

जापानमा यसको संक्रमणबाट ६ जनाको ज्यान गएको छ भने अमेरिकामा १९ जनाले ज्यान गुमाएका छन्। हालसम्म विश्वभरबाट सक्रमित हुनेको संख्या १ लाख ६ हजार १ सय ९१ पुगेका छ भने मृत्यु हुनेको संख्या ३ हजार ६ सय रहेको छ ।

चीनमा अहिले सम्म मृत्यु हुनेको संख्या ३ हजार ९७ जना रहेको विश्व स्वास्थ्य संगठनले जनाएको छ। ८० हजार ६ सय ९६ जनामा यसको संक्रमण रहेको र ५७ हजार ८३ जना संक्रमितको उपचार भएको चिनियाँ स्वास्थ्य मन्त्रालयले जनाएको छ ।

नेपालमा पनि एक जनामा कोरोनाको संक्रमण भेटिएको तर उपचारपछि निको भएर घर फर्किएको जनाईएको छ । कोरोनाको संक्रमण तीब्र रुपमा फैलिदै गएपछि नेपालले भने ठूला सभा सम्मेलन नगर्न, भीडभाडमा नजान आम नागरिकलाई सर्तक गराएको छ।