दमौली–पोखरा खण्डको अवरोध हटेपछि यात्रुलाई सहज

तनहुँ । दमौली–पोखरा खण्डको अवरोध हटेको छ । पृथ्वी राजमार्ग अन्तरगत उक्त सडक खण्डमा खसेको पहिरो चार घण्टा लगाएर पन्छाएपछि सडक खुलेको हो । विपद् व्यवस्थापन प्रहरी जनशक्ति टोली, स्थानीय पालिका र चाइनिज कम्पनीसँगको आवश्यक सहकार्यमा जेसिबीको माध्यमबाट उक्त पहिरो हटाएर बिहान १०ः ४० बजेबाट एकतर्फ सडक सुचारु गरिएको जिल्ला ट्राफिक प्रहरी कार्यालय तनहुँले जनाएको छ ।

सडक खुलेपछि यात्रुहरू आ–आफ्नो गन्तव्यमा लागेका छन् । आइतबार बिहान ४ः४० बजे तनहुँको म्याग्दे गाउँपालिका – ६ तुरतुरे मौरी बजारस्थित पृथ्वी राजमार्गमा माथिबाट सुख्खा पहिरो खस्न जाँदा अवरुद्ध भएको थियो ।