पेप्सीकोलाको वरुण वेभरेजलाई दुई लाख जरिवाना

काठमाडौं । पेयपदार्थ (स्लाइस) मा अखाद्य वस्तु भेटिएपछि पेप्सीकोलास्थित वरुण वेभरेज कारवाहीमा परेको छ । काठमाडौं महानगरपालिकाले वरुण वेभरेजलाई दुई लाख रुपैयाँ जरिवाना गरेको हो ।

बजार अनुगमनका क्रममा ढुसी परेको पेयपदार्थ (स्लाइस) फेला परेपछि उत्पादक कम्पनीलाई कारबाही स्वरुप दुई लाख रुपैयाँ जरिवाना गरिएको महानगरका कृषि तथा पशुपन्छी विभाग प्रमुख डा अवधेश झाले जनाएका हुन् ।

जरिनावा रकम आगामी एक साताभित्र बैंक खातामा जम्मा गर्न अनुगमन टोलीले पत्र थमाएको छ । एक साता भित्र जरिवाना नबुझाए थप कारबाही हुने बताइएको छ ।

अनुगमन टोलीले वरुणलाई बजारमा लगिएका अखाद्य सामग्री फिर्ता लिने व्यवस्था गर्न, उत्पादित बस्तुको गुणस्तर कायम गर्न, बजारमा नियित परीक्षणको व्यवस्था मिलाउन समेत निर्देशन दिएको छ ।