- १ कार्तिक २०८३, आईतवार / Oct 18, 2026
काठमाडौं । मल खरिद बिक्रीको रकममा अनियमितता गरेको आरोपमा साल्ट ट्रेडिङ कर्पोरेशन लिमिटेड, मल बिक्री केन्द्र, सल्यानका तत्कालीन जुनियर सहायक विजय कुमारपासवान माथि अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
मल विक्रीको रकम नियमानुसार हिसाबकिताब नराखी सार्वजनिक सम्पत्तिको हिनामिना र भ्रष्टाचार गरेको छानविनबाट खुलेको दावी सहित आयोगले पासवान माथि बुधबार विशेष अदालत काठमाडौंमा मुद्दा दायर गरेको हो।
तत्कालीन साल्ट ट्रेडिङ कर्पोरशन, सल्यान मल बिक्री केन्द्रका इन्चार्ज पासवानले आफ्नो जिम्माको मौज्दाज रासायनिक मल संस्थाको आधिकारिक खातामा रकम दाखिला गरेपश्चात मल डेलिभरी गर्नुपर्नेमा आफुखुशी आफ्नो व्यक्तिगत खातामा बदनियतसाथ रकम जम्मा गरी १८ लाख ७६ हजार, ६ सय ६४ रुपैयाँ बराबरको रासायनिक मल हिनामिना गरेको छानबिनबाट खुलेको छ।
भ्रष्टाचार निवारण ऐन, २०५९ को दफा १७ बमोजिमको कसुर भएकोले पासवानलाई सोही ऐनको दफा ३ को उपदफा १ र दफा ३ को उपदफा १ को खण्ड (च) बमोजिम १८ लाख ७६ हजार, ६ सय ६४ रुपैयाँ बराबर बिगो कायम गरी सजायको माग समेत गरिएको छ।
