- २ श्रावण २०८३, शनिबार / Jul 18, 2026
काठमाण्डौ । काठमाण्डौमा थुप्रिएको फोहोर व्यवस्थापन हुने काठमाडौं महानगरपालिकाले जनाएको छ । सिसडलका बासिन्दाले फोहोर विसर्जन गर्न अवरोध गरेपछि महानगरपालिकाले प्रहरीको सुरक्षामा बञ्चरेडाँडाको ल्याण्डफिल्ड साइटमा फोहोर पुर्याउन थालेको हो । नियमित फोहोर नउठ्दा काठमाण्डौका मुख्य सडकमा फोहोर थुप्रिन थालेको छ ।
शुत्रबारदेखि प्रहरीको सुरक्षामा फोहोर बोकेका गाडी ल्याण्डफिल्ड साइट पुग्न थालेपछि सडकमा थुप्रिएको फोहोर केही दिनमै उठाइसक्ने महानगरपालिकाले जनाएको छ । फोहोरको ढुवानी सहज नहुँदासम्म घरमै व्यवस्थापन गर्न महानगरपालिकाले अनुरोध गरेको छ । फोहोरका कारण दुर्गन्ध फैलिएको भन्दै स्थानीयबासिन्दाले गएको १ गतेदेखि फोहोर फाल्न अवरोध गर्दै आएका छन् ।
फोहोर माटोले छोप्नुपर्ने र दुर्गन्ध फैलिन रोक्नुपर्ने स्थानीयबासिन्दाको माग पूरा गर्ने मौखिक सहमति भैसकेको छ । तर सहमति कार्यान्वयन नभएको भन्दै ल्याण्डफिल्ड साइट नजिकका स्थानीयबासिन्दा आन्दोलनमै छन् । स्थानीयको अवरोध भएपछि काठमाण्डौ महानगरपालिकाले प्रहरीको सुरक्षामा फोहोर विसर्जन गर्न थालेको छ भने शुक्रबार एक सय ५२ वटा गाडीले बञ्चरेडाँडामा फोहोर विसर्जन गरेको जनाएको छ ।
