- ३१ असार २०८३, बुधबार / Jul 15, 2026
काठमाडौँ । नेपाली सेनामा अनियमितता र भ्रष्टाचार बढेको भन्दै त्यसको जवाफ रक्षामन्त्री ईश्वर पोखरेलले दिनु पर्ने साँसदले माग गरेका छन् । नियन्त्रणका उचित कदम चाल्नुपर्ने र सेनाभित्रको भ्रष्टाचारबारे र प्रधानसेनापति पूर्णचन्द्र थापालाई समितिमा बोलाउनु पर्ने उनीहरुले माग गरेका हुन् । रक्षमन्त्री र प्रधानसेनापति बैठकमा उपस्थित नभएसम्म छलफल गर्न नसकिने भन्दै सांसदहरुले माग गरेपछि बिहीबारको बैठक स्थगित भएको छ ।
सेनाभित्रको भ्रष्टाचार र अनियमितता रोक्नका लागि आवश्यक कानुन बनाउन परे पनि तयार हुनुपर्ने भन्दै रक्षामन्त्री र प्रधानसेनापतिसँग छलफल गर्न जरुरी रहेको बैठकमा सहभागी रेखा शर्मा, दिलेन्द्र बडु, अमरेशकुमार रसिंह, झपट रावल, देवेन्द्रराज कँडेल, कृष्णगोपाल श्रेष्ठ, डिला संग्रौला, लालबाबु पण्डित, बृजेशचन्द्र लाल लगायतले जोडदार माग राखे ।
उनीहरुको मागलाई सम्वोधन गर्दै सभापति शशी श्रेष्ठले रक्षामन्त्री र प्रधानसेनापतिलाई रक्षा सचिवमार्फत् बोलाउने जानकारी गराइन् । सांसद डिला संग्रौलाले फास्ट ट्रयाक, सेना मुख्यालय, गण र गुल्म बनाउँदा मात्रै होइन सरुवा र बढुवा गर्दासमेत सेनामा व्यापक भ्रष्टाचार भएको कुरा सार्वजनिक हुनु दुःखद भएको जिकिर गरिन्। सेनामा भएको आर्थिक र नीतिगत भ्रष्टाचार अख्तियारले हेर्न किन नपाउने भन्दै बिहीबारको बैठकमा सांसदहरुले सेनाभित्रको भ्रष्टाचार कोरोना भाइरसभन्दा पनि खतरनाक रहेको दाबी गरे ।
मुख्यालयदेखि गण र गुल्ममा समेत भ्रष्टाचार हुने गरेको भन्दै सेनाभित्र आर्थिक पारदर्शीता हुनैपर्ने बताए । सेनाको मुख्य काम विकास निर्माण नभई सुरक्षा गर्नु हो भन्दै साँसदहरुले नेपाली सेनाको पहिलो दायित्व के हो भन्ने स्पस्ट हुनुपर्ने बताए । सेनाले पेट्रोल पम्प, क्याटरिङ चलाएर व्यापार गर्नु ठीक नहुँने भन्दै सांसदले अख्तियारको दायरामा ल्याउनुपर्ने तर्क गरे । बैठककमा सांसद रेखा शर्माले तीन सदस्यीय कार्यदलमा सेनाभित्रका अनियमितताबारे ५० वटा उजुरी परेको बताइन् ।
ती उजुरीमाथि छानविन गरी चार वटा उजुरीमा समितिमा छलफल गर्न आवश्यक ठानेको उनको भनाई छ । नेपाली सेना भनेको देशकै आशा र भरोसाको केन्द्र भएकाले पनि यस्ता गुनासोहरुप्रति गम्भीर हुनुपर्ने उनको भनाई छ । यसअघि पनि समितिमा भ्रष्टाचार बढेको भन्दै उजुरी परेपछि सांसद रेखा शर्माको संयोजकत्वमा ३ सदस्यीय कार्यदल गठन गरेको थियो ।
