अबिरल पानीले यस्तो छ सडकको हालखबर

६ श्रावण २०७७ काठमाडौं । अबिरल वर्षाका कारण देशभरका दुई दर्जनभन्दा बढी सडक अवरुद्ध भएको छ । ठाउँ ठाउँमा बाढी पहिरो जादा ग्रामीण क्षेत्रका सडकहरु अवरुद्ध भएका हुन् ।

सडक भासिने, ठुलो पहिरो झर्ने र ढुंगा खस्ने, डाइभर्सन नदीको बाढीले बगाउने, सडकमाथिबाट पहिरो आइ बेलिब्रेज नदीले बगाउने लगायतका समस्याका कारण अहिले विभिन्न सडकहरु अवरुद्ध भएका छन् । अवरुद्ध भएका सडकको निरीक्षण भइरहेको विभागका प्रवक्ता शिवहरी सापकोटाले बताए ।

बाढी पहिरोका कारण अरनिको राजमार्ग अन्तर्गत चेनेज ८८ किमिदेखि ८ सय किमिसम्मको खुर्सानी बारी सडकमा १ सय ५० मिटर सडक भोटेकोशी नदीले कटान गरेको छ । अरनिको राजमार्ग अन्तर्गत ८९ किमिदेखि ४ सय किमीसम्मको खग्दोल सडक असार २५ गतेबाट अवरुद्ध भएको छ ।

अरनिको राजमार्ग अन्तर्गत जम्बु, झ्याले, चाकु, डाकलांग, माथिलो भोटेकोशी ड्याम सडक निरन्तरको वर्षाले सडक भासिने, पहिरो जाने जस्ता समस्याका कारण पुर्ण रुपमा बन्द छन् । यता जल तथा मौसम विज्ञान विभागले नेपालमा भारी वर्षा हुने पुर्वानुमान गरेको छ ।