- ३१ असार २०८३, बुधबार / Jul 15, 2026
१२ साउन २०७७ काठमाडौं । सातवटै प्रदेशका आन्तरिक मामिला तथा कानून मन्त्रीलाई काठमाडौं बोलाएर गृहमन्त्री रामबहादुर थापा बादलले प्रहरी समायोजनसम्बन्धी छलफल गरेका छन् । सिंहदरबारमा भएको भेटमा अधिकांश मन्त्रीले अधिकार प्रत्यायोजन चाँडै टुंग्याएर समायोजन प्रक्रिया थाल्नु पर्ने बताएका छन् ।
उपत्यका प्रहरीलाई संघीइ सरकार मातहत राख्ने वा प्रदेश मातहत राख्ने विषयमा विवाद कायमै छ । छलफल भए पनि टुंगो लागि नसकेको बागमती प्रदेशका आन्तरिक मामिला तथा कानुनमन्त्री शालिक जमरकट्टेले बताए । उपत्यका प्रहरीलाई केन्द्र मातहत राख्ने दाउमा गृह मन्त्रालय र प्रहरी प्रधान कार्यालयको जिकिर छ । तर कर्णाली प्रदेशका आन्तरिक मामिला तथा कानुनमन्त्री नरेश भण्डारी भने प्रदेशको मातहतमा हुनु पर्ने बताउछन् ।
उपत्यका प्रहरी केन्द्र भन्दा प्रदेश मातहत राख्दा संघीयताको मर्मकार्यान्वयन हुने दावी उनको छ । छलफलमा सबै प्रदेशका मन्त्रीज्यूको कुरा प्रदेश मातहतमै हुनु पर्ने छ । जवाफमा गृहमन्त्री थापाले अझै छलफल बाँकी रहेकाले अहिले नै टुंङ्गो नलाग्ने बताए । समायोजनसम्बन्धी समन्वय समितिको बैठकमा थप छलफल गरेर निष्कर्षमा पुग्न सकिने उनको भनाई छ ।
समितिमा संघीय सरकारका गृहमन्त्रीसहित सबै प्रदेशका आन्तरिक मामिला तथा कानुन मन्त्री सदस्य र प्रहरी महानिरीक्षक सदस्य सचिव छन् । प्रदेशका मन्त्रीहरुले प्रदेशभित्र एसपी सरुवाको अधिकार पनि माग गरेका छन् । १५ जना एसपी केन्द्रले पठाइदिएपछि कुन जिल्लामा पठाउने भन्ने अधिकार प्रदेशको हुनुपर्ने जाडदार माग प्रदेशमन्त्रीले गरेका छन् । हाल प्रदेशलाई प्रहरी निरीक्षकसम्मको सरुवा गर्ने अधिकार दिइएको छ ।
