ओलीले लहडमा संसद् विघटन नगरेको भए गठबन्धन बन्दैन थियोः देउवा

डडेल्धुरा । वर्तमान संविधानको रक्षाका लागि सत्ता गठबन्धन निर्माण भएको प्रधानमन्त्री एवं नेपाली कांग्रेसका सभापति शेरबहादुर देउवाले बताएका छन् ।

डडेल्धुराको आलिताल गाउँपालिकामा आयोजित चुनावीसभालाई सम्बोधन गर्दै देउवाले तत्कालीन प्रधानमन्त्री केपी ओलीले आफ्नो लहडमा पटकपटक संसद् विघटन गरेर संविधानको हत्या गर्न खोजेको भन्दै त्यसको रक्षाका लागि गठबन्धनका सबै नेता मिलेर आफूलाई प्रधानमन्त्री बनाएको जिकिर गरे ।

लोकतान्त्रिक गणतन्त्र र समावेशी राजनीतिलाई बचाउन वर्तमान अवस्था आएको बताए । प्रतिनिधिसभा र प्रदेशसभामा गठबन्धन विजयी हुन आवश्यक रहेको उनको भनाइ छ । नेकपा एमालेका अध्यक्ष केपी शर्मा ओलीले दुई पटक संसद् विघठन गरेपछि गठबन्धन बनेको प्रधानमन्त्री देउवाको भनाइ थियो ।