- १३ असार २०८३, शनिबार / Jun 27, 2026
काठमाडौं । आजदेखि सरकारले कर्मचारी सरुवा, पदस्थापनदेखि राजनीतिक नियुक्तिसम्मका निर्णय गर्न नपाउने भएको छ ।
४ मंसिरको चुनाव प्रभावित नहोस् भन्नका लागि निर्वाचन आयोगले २० भदौसम्मको समयसीमा तोकेको थियो । चुनाव सुरु हुनुभन्दा साढे दुई महिना पहिलादेखि आयोगले सरकारी निर्णयमा अंकुश लगाएको हो ।
सत्तामा रहेर चुनाव प्रभावित पार्ने चलखेल हुने भन्दै कर्मचारी सरुवा तथा राजनीतिक नियुक्तिमात्र होइन, चुनाव केन्द्रीत शिलान्याश र उद्घाटनमा समेत रोक लगाएको छ ।
सरकारलाई २० भदौभित्र कर्मचारी सरुवा तथा नियुक्तिको निर्णय सक्न निर्देशन दिएको आयोगका प्रवक्ता शालिग्राम शर्मा पौडेलले बताए ।
सरकारले अनुकूलको सीडीओ, जिल्ला प्रहरी प्रमुख लगायतका सरुवा गर्दा चुनाव प्रभावित हुनसक्ने आंशका गरिन्छ । सोही कारण अंकुश लगाउने प्रयास गरिन्छ ।
सरकारले चुनावी प्रयोजनका लागि अतिआवश्यक परेमा वा चुनावलाई कुनै प्रभाव नपार्ने भएमा आयोगको सहमतिमा कर्मचारी सरुवा र राजनीतिक नियुक्ति भने गर्न सक्ने छ । आजदेखि मन्त्रिपरिषद्ले चुनाव प्रभाव पार्ने गरी कुनै निर्णय गरे त्यसमा आयोगले प्रश्न गर्ने छ ।
