- १० आश्विन २०८३, शनिबार / Sep 26, 2026
काठमाडौँ, । कागेश्वरी मनोहरा नगरपालिकाको पछिल्लो मतपरिणाम अनुसार नेपाली कांग्रेसका उपेन्द्र कार्कीले अग्रता लिनुभएको छ । पछिल्लो पटक सार्वजनिक भएको मतपरिणाम अनुसार कार्कीले तीन हजार ५५१ मत पाउनुभएको छ । उहाँलाई पछ्याउँदै नेकपा एमालेका रामशरण ढुङ्गानाले तीन हजार १०७ मत ल्याउनुभएको निर्वाचन अधिकृत शारदा राउतले जानकारी दिनुभयो । नगर प्रमुखमा नेकपा एकीकृत समाजवादीका कृष्णहरि थापाले एक हजार ३१ मत पाउनुभएको छ । थापा विसं २०७४ को स्थानीय तह निर्वाचनमा एमालेका तर्फबाट नगर प्रमुख निर्वाचित हुनुभएको थियो । नगर प्रमुखमा राष्ट्रिय प्रजातन्त्र पार्टी राप्रपा का राजु फुयाँलले २६८ मत पाउनुभएको छ ।
यसैगरी उपप्रमुखमा एमालेका शान्ता थापाले तीन हजार ९२५ मतका साथ अग्रता कायम गर्नुभएको छ । उहाँलाई पछ्याउँदै नेकपा माओवादी केन्द्रका भोला चापागाईले एक हजार ७८८ मत पाउनुभएको छ । समाजवादीका सरस्वती नेपालले ५१९ मतका साथ पछ्याइरहनुभएको छ । नगर उपप्रमुख राप्रपाका उम्मेद्वारले ४३५ मत पाउनुभएको छ ।
वडा नं ९ मा कांग्रेसका अनिल थापा विजयी
नगरपालिकाको ९ नं। वडामा कांग्रेसका अनिल थापा वडाध्यक्ष पदमा विजयी हुनुभएको छ । उहाँले एक हजार ५०२ मत प्राप्त गर्नुभयो । उहाँका निकटतम् प्रतिद्वन्द्वी एमालेका उम्मेदवारले एक हजार ४४१ मत पाउनुभएको नगर निर्वाचन कार्यालयले जनाएको छ । वडा नं १ मा भने यसअघि नै एमालेका मुकुन्द गजुरेल निर्वाचित भइसक्नुभएको छ । उहाँले एक हजार ७०७ मत पाउनुभयो । उहाँका निकटतम प्रतिद्वन्द्वी कांग्रेसका लक्ष्मण खड्काले एक हजार ४३७ मत पाउनुभएको निर्वाचन कार्यालय जनाएको छ । अहिले नगरपालिकाको वडा नं २ र ८ को मतगणना भइरहेको छ ।
नगरपालिकामा कूल ३५ हजार ४९३ मतदाता छन् । जसमध्ये २६ हजार ९२८ मत खसेको थियो । यो कूल मतदाता सङ्ख्याको ७६ प्रतिशत भएको नगर निर्वाचन अधिकृतको कार्यालयले जनाएको छ । विसं २०७४ को स्थानीय तह निर्वाचनमा नगरपालिकामा एमाले विजयी भएको थियो । सो निर्वाचनमा एमालेले छ वटा वडामा वडाध्यक्षसहित नगर उपप्रमुख पदमा पनि विजयी भएको थियो । कांग्रेसले तीन वटा वडामा जितेको थियो ।
