कोरोना विरूद्धको खोप प्रयोगमा ल्याउदै चीन

एजेन्सी । (कोभिड १९) चीनले कोरोना भाइरसविरुद्धको खोप आउँदो महिनादेखि प्रयोगमा ल्याउन सकिने दाबी गरेको छ। पाँचवटा विधिबाट अहिले खोपसम्बन्धी सामग्रीहरु विकास गरेर यसको प्रभावकारिता र सुरक्षाका लागि जनावरहरुमा प्रयोग गरिन लागिएको जनाएको छ ।

विश्वभर एक लाख मानिसमा संक्रमण भेटिएका बेला चीनले कोरोना प्रतिरोधी खोप सार्वजनिक गर्न लागेको हो। मुलुकको सवै नियम र कानूनी प्रावधानहरु पुरा गर्दै आउँदो अप्रिल महिनादेखि कोरोनाविरुद्धको खोप चिकित्सकीय र आपत्तकालिन प्रयोजनमा ल्याउने चीनको प्राविधिक विकास तथा अनुसन्धान केन्द्रका निर्देशक झेङ झोङ्गुइले बताएका छन् ।

वैज्ञानिकहरुले पाँचवटा विधिबाट कोरोनाविरुद्धको खोप बनाइरहेको चीनियाँ अधिकारीको दाबी छ । चीनको राष्ट्रिय स्वास्थ्य विभागले पनि आउँदो महिना नै कोरोनाविरुद्धको पहिलो भ्याक्सिन प्रयोगमा आउने जनाएको छ। चीनको उहान शहरमा सन् २०१९ को अन्त्यतिरबाट कोरोना संक्रमण फैलिएको थियो।

सो लगत्तै चीनियाँ वैज्ञानिकहरुले विभिन्न अनुसन्धान थालेका थिए। दर्जनभन्दा बढी कम्पनीको अनुसन्धानमाथि मूल्यांकन गर्दै चीन सरकारले विभिन्न आठवटा कम्पनीहरुलाई कोरोना विरुद्धको पहिलो भ्याक्सिन एकैसाथ र पाँचवटा फरक विधिबाट बनाउन स्वीकृति दिएको थियो।