जंगली जनावरको चोरी शिकार बढ्यो

सर्लाही । सर्लाहीमा वन्यजन्तुको अवैध चोरी शिकार बढेको छ । पछिल्लो समय वन्यजन्तु वास स्थान र आहाराको खोजीमा जंगल आसपास रहेका बस्तीमा पस्न थालेपछि वन्यजन्तुको चोरी शिकार बढेको पाइएको हो । रातको समयमा जंगली जनावरले बालीनालीमा बढी नोक्सान पुर्‍याउने भएकाले शिकार खेल्न जाने स्थानीय समूह बढेको छ ।

सर्लाहीको सबै वनक्षेत्रमा डढेलो लागेपछि जंगली जनावर वास स्थान र आहाराको खोजीमा बस्तीमा पस्न थालेका छन् । वनक्षेत्रमा पर्ने जानकीनगर, शंकरपुर, सागरनाथ वन परियोजना, हजरिया, राजघाट, मुर्तिया घुर्कौली चुरेक्षेत्र लगायतको स्थानमा लोपोन्मुख प्रजातिका बँदेल, हरिण, नीलगाई, दुम्सी, मृगलगायत वन्यजन्तुको अवैध चोरी शिकार बढ्दै गइरहेको छ ।

विशेष गरी प्रत्येक दिनजसो बिहानीपख बन्दुक पड्केको आवाज आउने गरेको छ। बरहथवा, हरिपुर, बागमती, लालबन्दी, हरिवन, ईश्वरपुरको वनक्षेत्रमा अवैध हातहतियार, करेन्ट र जालको प्रयोग गरी जंगली जनावर चोरी शिकार भइरहेको छ ।