- २५ फाल्गुन २०८२, सोमबार / Mar 9, 2026
९ बैशाख २०७७ काठमाडौं । सरकारलाई आफ्नो मूल जिम्मेवारीबाट भाग्न नहुने तर्क नेकपाका बरिष्ठ नेता माधब कुमार नेपालले सुझाव दिएका छन् । हाल विकसित कतिपय घटनाक्रमले पार्टीभित्र अनेकौं आशंका र चिन्ता उत्पन्न भएको भन्दै पूर्वप्रधानमन्त्रीसमेत रहेका उनले यस्तो अवस्थामा सरकार जिम्मेवारीका साथ अघि बढ्नु पर्ने बताएका छन् ।
सरकारले हतार हतार दुई अध्यादेश जारी गरेपछि उत्पन्न परिस्थितिबारे आफ्नो धारणा सार्वजनिक गर्दै नेपालले राजनीतिक दल विभाजनसम्बन्धी र संवैधानिक आयोग गठनसम्बन्धी दुई विधेयकबारे सोमबार नेकपा सचिवालयमा भएको छलफलका बारेमा एक वक्तव्य समेत जारी गरेका छन् ।
नेता नेपालले अहिलेको विषम परिस्थितिमा सरकार पार्टीले आफ्नो जिम्मेवारीबाट भागेर अन्यत्र ध्यान मोड्ने कोशिशमा नलाग्न पनि अपिल गरेका छन् । महामारीले विश्वसहित नेपाललाई आक्रान्त पारिरहेको बेला सरकार तथा सरकारको नेतृत्व गरिरहेको पार्टीका हैसियतले सिंगो राष्ट्र, पार्टीसहित अन्य दलका नेता, कार्यकर्ता र जनताको ध्यान महामारीको संक्रमणविरुद्ध लड्ने काममा केन्द्रित गर्न आग्रह गरेका छन् ।
