- १३ कार्तिक २०८३, शुक्रबार / Oct 30, 2026
जुम्ला । जुम्ला प्रहरीले शृङ्खलाबद्ध आगजनीका घटनामा संलग्नलाई सार्वजननिक गरेको छ । साउन ५ र ६ गते तथा विभिन्न समयमा सात वटा घर, ट्रक्टर र अटो रिक्सामा आगजनी गर्नेलाई जुम्ला प्रहरीले मंगलबार सार्वजनिक गरेको हो ।
नचिनेका व्यक्तिका समूहबाट जलेका भनिएका सात वटा घर रत्नबहादुर अधिकारीले जलाएको पुष्टि भएको हो । एकै समयमा जलेको ट्र्याक्टर, अटो रिक्सामा समेत उनले आगजनी गरेको खुलेको जिल्ला प्रहरी कार्यालय जुम्लाले जनाएको छ ।
जुम्लाको गुठीचौर गाउँपालिका–४ उखाडी घर भई चन्दननाथ नगरपालिका–२ भण्डारीवाडा बस्ने रत्नबहादुर अधिकारीलाई प्रहरीले सार्वजनिक गरेको हो । रत्नबहादुरले आफू गरिब भएकाले कसैले पनि ऋण नदिएको, उधारो पनि नपत्याउने भएकाले यस्ता कार्य गरेको प्रहरीले जनाएको छ ।
प्रहरीका अनुसार उनले नेपाली सेनामा केही समय जागिर खाएर छोडेका थिए । प्रहरीले उनलाई साउन ६ गते पक्राउ गरेको थियो । अधिकारीले साउन २ गते चन्दननाथका साउनेखर कामीको गाईभैँसी पाल्ने कच्ची गोठसमेत जलाएको प्रहरीले जनाएको छ ।
