जेष्ठ नागरिकहरुलाई निःशुल्क मोवाइल वितरण गरिने

भक्तपुर । ७५ वर्ष पूरा गरेका जेष्ठ नागरिकहरुलाई सूर्यविनायक नगरपालिका वडा नं ८ ले निःशुल्क मोवाइल वितरण गर्ने भएको छ । भक्तपुरको सूर्यविनायक नगरपालिका वडा नं ८ सिपाडोलमा रहेका जेष्ठ नागरिकहरुलाई प्रतिव्यक्ति मोवाइल सेट एक थान र नेपाल टेलिकमको एउटा–एउटा सिमकार्ड वितरण गर्ने भएको हो ।

वडा कार्यालयले जारी गरेको सूचना अनुसार असार मसान्तभित्र ७५ वर्ष पूरा गरेका जेष्ठ नागरिकलाई वितरण गरिने जनाएको छ । मोवाइल कति मूल्य पर्ने वितरण गर्ने हो त्यो भने खुलाइएको छैन । मोवाइल वितरण गर्ने कार्यलाई अर्को आर्थिक वर्ष पनि निरन्तरता दिने सूचनामा उल्लेख छ । यसको लागि नागरिकताको प्रतिलिपि र पासपोर्ट साइजको फोटो वडा कार्यालयमा बुझाउन सूचनामा भनिएको छ ।