धेरै नेपाली रहेका देशहरुमा साउन १ गतेदेखि मतदाता नामावली संकलन गरिने

काठमाडौं । वैदेशिक रोजगारीका लागि धेरै नेपाली रहेका देशहरुमा निर्वाचन आयोगले साउन १ गतेदेखि मतदाता नामावली संकलन गर्ने भएको छ। धेरै नेपाली कार्यरत दुबई, मलेसिया, कोरिया लगायत देशबाट मतदाता नामावली संकलन सुरु गरिने संसद्‍को राष्ट्रिय सरोकार तथा समन्वय समितिको सोमबारको बैठकमा प्रमुख निर्वाचन आयुक्त दिनेशकुमार थपलियाले बताएका हुन ।

प्रमुख आयुक्त थपलियाले जिल्ला निर्वाचन कार्यालय खारेज गर्ने निर्णय सरकारले नसच्याए साउन १ गतेदेखि काम ठप्प हुने चेतावनी समेत दिए। सम्बन्धित देशमा रहेका कूटनीतिक नियोगका प्रतिनिधि तथा कर्मचारीमार्फत नै मतदाता नामावली संकलन गरिने निर्वाचन आयोगले जनाएको छ ।

जिल्ला निर्वाचन कार्यालय खारेज गर्ने सरकारको घोषणाप्रति आयोगले असन्तुष्टि जनाइरहेका बेला समितिले आयोगका पदाधिकारीहरुसँग एकीकृत निर्वाचन कानुन, निर्वाचन प्रणाली सुधार लगायत विषयमा छलफल गरेको छ । सरकारले बजेटमार्फत जिल्ला निर्वाचन कार्यालय खारेज गरी जिल्ला प्रशासन कार्यालयबाट निर्वाचनसम्बन्धी कार्य सन्चालन गर्ने घोषणा गरेको थियो। समितिको बैठकमा सदस्यहरुले निर्वाचन प्रणालीमा सुधारको खाँचो रहेको औंल्याएका थिए।