- ३१ असार २०८३, बुधबार / Jul 15, 2026
२३ साउन २०७७ नुवाकोट । स्थानीय तहमा कोरोना सङ्क्रमणको जोखिम बढेसँगै ‘लकडाउन’ गरिएको छ । सङ्कट व्यवस्थापन केन्द्रको बैठकले जिल्लाभित्र सञ्चालन हुने यात्रुवाहक सार्वजनिक यातायातका साधन अर्को निर्णय नहुँदासम्म सञ्चालनमा रोक लगाएको छ ।
बिहीबार बसेको बैठकले अत्यावश्यक सेवाका साधन र अनुमतिप्राप्त साधनबाहेक अन्य सवारीसाधन जिल्ला प्रवेशमा पूर्ण रोक लगाउने निर्णय गरेको छ । राति ८ बजेदेखि बिहान ६ बजेसम्म एम्बुलेन्सबाहेक अरु कुनै पनि सवारी साधन जिल्लामा प्रवेश गर्न नदिने निर्णय गरिएको केन्द्रका संयोजक एवं प्रमुख जिल्ला अधिकारी झङ्कनाथ ढकालले बताए ।
बेलकोटगढी नपा–५ स्थित कोल्पुखोला पुलबाट दुईपिपलतर्फ जाने सडकबाट आवतजावतमा रोक लगाउने, क्वारेन्टिन तोकिएका होटलबाहेक अन्य सबै प्रकारका चिया पसल, होटल, लज तथा रेष्टुरेन्ट बन्द गरिने, धार्मिकस्थलमा सामूहिक भेला हुन नदिने, सामूहिक भएर मनाइने मेला, जात्रा, पर्व तथा समारोह सञ्चालन गर्न नपाउने निर्णय बैठकले गरेको हो ।
केन्द्रले जिल्लाको ८८ वटै वडामा वडाध्यक्षको संयोजकत्वमा ‘कोरोना रोकथाम समूह’ गठन गर्ने, जिल्ला प्रवेश गर्ने बेलकोटगढी नगरपालिकास्थित कोल्पुटार नाकालाई थप व्यवस्थित बनाउने तथा ककनी र शिवपुरी गाउँपालिकास्थित सबै नाकामा स्वास्थ्य सहायताकक्ष स्थापना गर्ने निर्णय पनि गरेको छ । कोरेना सङ्क्रमण रोक्न जिल्लाभित्र कडाइ गरिएको ढकालले बताए ।
