- २६ असार २०८३, शुक्रबार / Jul 10, 2026
४ असार २०७७ बिहीबार, काठमाडौं । कोरोना संक्रमणबाट थप दुई जनाको मृत्यु भएको छ । यो सँगै नेपालमा कोरोना संक्रमितको मृत्यु संख्या २२ पुगेको छ ।
गोदावरी नगरपालिका ४ कैलालीका ४६ वर्षीय पुरुषको कोरोना संक्रमणका कारण मृत्यु भएको हो । सेती प्रादेशिक अस्पतालमा उपचाररत उनको मृत्यु भएको स्वास्थ्य तथा जनसंख्या मन्त्रालयले जनाएको छ । स्वास्थ्यमा समस्या आएपछि उनी धनगढीको नवजीवन अस्पतालमा उपचारका लागि पुगेका थिए ।
जेठ ३१ गते कोरोना पुष्टि भएपछि उनलाई सेती अस्पतालमा सारिएको थियाे । यस्तै, लम्कीजुहा २ कैलालीकी एक ४२ वर्षीय महिलाको पनि मृत्यु भएको छ । टाउकोमा चोट लागेर शवड्युरल हेमाटोमा भएकी उनी जेठ ३१ गते नेपालगञ्ज मेडिकल कलेजको शिक्षण अस्पताल भर्ना भएकी थिइन् ।
उनको शल्यक्रिया गर्नुअघि असार २ गते स्वाब संकलन गरिएको थियो । तर उनको रिपोर्ट नआउँदै असार २ गते मृत्यु भएको मन्त्रालयले जनाएको छ । मृत्युपछि असार ३ गते आएको रिपोर्टमा उनको कोरोना पोजेटिभ भेटिएको हाे ।
