पृथ्वी राजमार्गमा वर्षायामभरि सडक स्तरोन्नतिका काम बन्द हुने

तनहुँ । तनहुँको बन्दीपुर गाउँपालिका ४ फेदीखोलाको पृथ्वी राजमार्गमा खसेको पहिरो डोजरको सहायताले पन्छाइँदै । तनहुँ – मुग्लिन–पोखरा सडक विस्तारअन्तर्गत पृथ्वी राजमार्गमा वर्षायामभरि सडक स्तरोन्नतिका काम बन्द हुने भएको छ । मनसुन अवधिभरि कालोपत्र तथा सडक विस्तारको काम रोकेर पानीले असर नगर्ने नाला, कल्भर्ट र पर्खाल निर्माणलाई जोड दिइएको आयोजनाले जनाएको छ ।

मनसुन सक्रिय रहँदासम्म कालोपत्र र सडक विस्तार रोकी अन्य निर्माणलाई प्राथमिकता दिइएको मुग्लिन–पोखरा सडक आयोजनाअन्तर्गत पूर्वी खण्डका इन्जिनियर विष्णु पाण्डेले जानकारी बताए । उनका अनुसार पहिरो जान सक्ने ठाउँमा भूक्षय रोक्ने किसिमका बिरुवा लगाउने, सडकको छेउमा दुबो रोप्नेलगायतका कार्य भइरहेका छन् । अहिलेसम्म पूर्वी खण्डमा ६२ र पश्चिम खण्डमा २८ प्रतिशत प्रगति भइसकेको छ । राजमार्गको ८० किलोमिटर सडकमध्ये झन्डै ५३ किलोमिटर सडकमा कालोपत्र भइसकेको उनले जानकारी दिए । रासस