- २५ फाल्गुन २०८२, सोमबार / Mar 9, 2026
७ बैशाख २०७७ बारा । मुलुक २७ दिनदेखि लकडाउनमा रहेको छ । यही कोरोना महामारीकै बेला जिल्लामा अर्को विपत्ति परेको छ । बाराका किसानलाई यही समयमा आएको अर्को विपत्तिले पीडासंगै थप चपेटामा पारिदिएको छ । हावाहुरी र असिनापानीले ठूलो क्षति पुर्याएको छ। किसानले लगाएको गहुँ र मकै तथा केरा खेतीमाअधिक क्षति पु¥याएको छ ।
किसानले ११ सय विगाहा क्षेत्रफलमा लगाएको केरा ७५ प्रतिशत क्षति पुगेको छ। करिब ४० करोड बराबरको क्षति भएको किसानले बताएका छन् । अधिकांश किसानले बीमा समेत नगरेकाले सरकारसँग राहत उपलब्ध गराउन माग गरिने बताएका छन् ।
साढे तीन बिगाहा जमिन भाडामा लिएर खेती गरेका निजगढका किसान विनोद न्यौपानले केरा खेती हुरीले ढालेर नष्ट पारिदिएपछि अब कसरी तिर्ने भन्ने चिन्ता सुरु भएको बताए। गहुँ बालि भित्र्याउने समयमा आएको असिना पानीले पाकेको गहुँ खेतमै झारिदिएको, मकैका बोटहरु भाँचिदिएको, फलफुल खेतीमा ठुलो नोक्सान भएको किसानले बताएका छन्।
आँप, लिची, कटहरलगायत फलफुल नष्ट भएको कृषि ज्ञान केन्द्रका बाराका प्रमुख जितेन्द्र यादवले बताए। उनले तरकारी र फलफुल खेती बढी क्षति भएको बताए। प्रहरी चौकी लंगडाको छाना समेत उडाईदिएको छ। क्षतिको लगत संकलन भइरहेकाले तत्काल यकिन गर्न नसकिने जिल्लाका प्रहरी प्रवक्ता गौतम मिश्रले बताए। हावाहुरीले निजगढका दर्जन बढी घरको छानो उडाएको छ । हुरीले घरको छानो उडाएपछि अहिले बिचल्ली भएको बाराको निजगढ ४ का ममता धामीले बताईन्।
