- २२ असार २०८३, सोमबार / Jul 6, 2026
दैलेख । माओवादीको नाममा चन्दा असुली गरेका दुई युवा पक्राउ गरेका छन् । दुल्लु नगरपालिका– १३ बस्ने १९ वर्षीय समिर शाही र २८ वर्षीय चन्द्रबहादुर शाही पक्राउ परेका हुन् ।
नेपाल कम्यूनिष्ट पार्टी (माओवादी) लाई आर्थिक सहयोग गरिदिन भन्दै दुल्लु नगरपालिकाका मेयर भरत रिजाललाई रसिद र पत्र बुझाएका थिए ।
माओवादीलाई ५० हजार रुपैयाँ आर्थिक सहयोग गरिदिनु भन्ने रसिद र पत्र दुल्लु नगरपालिकाको कार्यालयमा बुझाएको गोप्य सूचनाका आधारमा खोजी कार्य थालेको प्रहरीले शाहीलाई इलाका प्रहरी कार्यालय दुल्लुले पक्राउ गरेको प्रहरी निरीक्षक कृष्ण डाँगीले बताए ।
डाँगीको नेतृत्वमा खटिएको प्रहरी टोलीले दुवैलाई नियन्त्रणमा लिएको हो । उनीहरुको साथबाट नेपाल कम्युनिष्ट पार्टी (माओवादीको) पाँच थान पम्पेलेट, पार्टीको एक थान सहयोग ठेली, एक थान स्टमप्याट, एक थान पार्टीको छाँप,
डायरी र कपी बरामद गरिएको प्रहरी निरीक्षक कार्कीले बताए । जिल्ला सरकारी वकिल कार्यालयमार्फत दैलेख जिल्ला अदालतमा चन्दा ऐन २०३० सम्बन्धी मुद्दा दर्ता भई पाँच दिनको म्याद थप गरि उनीहरुलाई हिरासतमा राखेर थप अनुसन्धान थालिएको प्रहरी निरीक्षक कार्कीले बताए ।
