- २ असार २०८३, मंगलवार / Jun 16, 2026
काठमाडौं । नेकपा माओवादी केन्द्रका मन्त्रीहरुलाई भेट्न अब सिंहदरबार धाउन नपर्ने निर्णय गरिएको छ । नयाँ वर्षदेखि माओवादी केन्द्रले आफ्नो पार्टीबाट मन्त्री बनेकाहरुसँग केन्द्रीय कार्यालय पेरिसडाँडा मात्रै भेट्ने व्यवस्था गर्न लागेको हो ।
वैशाख १ गतेदेखि माओवादी मन्त्रीहरुलाई पार्टी कार्यालयमा भेट्ने व्यवस्था गर्न लागिएको माओवादी केन्द्रको केन्द्रीय कार्यालय सचिव श्रीराम ढकालले बताए ।
हप्तामा एक दिन दिउँसो चार बजेदेखि ६ बजेसम्म केन्द्रीय कार्यालयमा भेट्ने व्यवस्था मिलाउँन लागिएको सचिव ढकालले बताए । कार्यालय समयमा काममा डिस्टर्ब नहोस् र मन्त्रीहरुले सरकारकै काममा ध्यान दिउन् भनेर अपराह्न ४ बजे पार्टी कार्यालयमा समय दिने गरी व्यवस्थित गर्न लागिएको हो ।
मन्त्रालय र क्वाटरमा मन्त्रीहरुसँग भेट्नेहरुको भिडभाड बढेपछि त्यसलाई व्यवस्थित गर्नुपर्ने भएकाले माओवादी पदाधिकारी बैठकले यस्तो मिलाउन लागेको हो । भेटघाट व्यवस्थित गर्न पार्टी केन्द्रीय कार्यालय पेरिसडाँडामा हेल्प डेस्क समेत स्थापना गर्ने तयारी भएको छ ।
हेल्प डेस्कमा खटिने कार्यालयका कर्मचारीले कुन मन्त्रीलाई भेट्ने, को–कोले भेट्ने र भेट्न खोज्नुको कारण के हो ? विवरण टिपेर भेटघाटमा सहजीकरण गरिदिने सचिव ढकालले बताए ।
