तनहुँ । फर्निचर तथा फर्निसिङ व्यवसायी सङ्घले सरकारी कार्यालयअन्तर्गत सामान खरिद प्रक्रियामा स्थानीय व्यवसायीलाई प्राथामिकता दिइनुपर्ने माग गर्दैै स्थानीय निकायलाई ज्ञापनपत्र बुझाएको छ । जिल्लाको भिमाद नगरपालिका, शुक्लागण्डकी नगरपालिका र व्यासनगरपालिकालाई सोमबार त्यस्तो ज्ञापनपत्र बुझाएका हो ।
भिमादका प्रमुख मेखबहादुर थापा, शुक्लागण्डकीका प्रमुख किसान गुरुङ र व्यासका प्रमुख बैकुण्ठ न्यौपानेलाई सङ्घका अध्यक्ष अमरबहादुर भण्डारीले ज्ञापनपत्र बुझाएका हुन् । अव्यवस्थितरूपमा सञ्चालन हँुदै आएका फर्निचर व्यवसायीलाई व्यवस्थित गरी राजस्व चुहावट हुनबाट रोक्न पालिकालाई जानकारी गराएका थिए ।
आउँदा दिनमा भानु, बन्दीपुर र आँबुखैरेनी गाउँपालिकामा ज्ञापनपत्र बुझाउने कार्यक्रम रहेको सङ्घका महासचिव सन्तोष विकले जानकारी दिनुभयो । नेपाल फर्निचर तथा फर्निसिङ महासङ्घमा ३४ जिल्ला आवद्ध भएका छन् भने जिल्लामा करिब ७० वटा फर्निचर र फर्निसिङ व्यवसाय सञ्चालनमा रहेको उहाँले बताउनुभयो । दर्ता नगरी व्यवसाय सञ्चालनमा रहेका उद्योग व्यवसायीलाई कानुनी दायरमा ल्याउनसमेत स्थानीय तहलाई आग्रह गरिएको छ ।
