सरकारले विभूषण रद्द गर्न सक्ने चेतावनी सहित विभूषण नबेच्न महावीर पुनलाई गृह मन्त्रालयको पत्र

काठमाण्डौ । सरकारले दिएको विभूषण लिलामीमा नराख्न गृह मन्त्रालयले राष्ट्रिय आविष्कार केन्द्रका प्रमुख महावीर पुनलाई आग्रह गरेको छ । कुनै नेपाली र विदेशीलाई दिएको मानपaदवी र विभूषण कसैलाई बिक्री गरेमा, बन्धकी राखेमा वा मर्यादा विपरीत हुने गरी प्रयोग गरेमा सरकारले विभूषण रद्द गर्ने विषय स्मरण गराउँदै मन्त्रालयले महावीर पुनलाई एक जानकारी पत्र पठाएको हो ।

नेपाल सरकारले दिएको मानपदवी उज्जवल कीर्तियम राष्ट्रदीप द्वितीय श्रेणी न्यूनतम मूल्यसमेत उल्लेख गरेर बिक्रीका लागि लिलामीमा राखिएको विषय सामाजिक सञ्जालमा सार्वजनिक भएकोले त्यसो नगर्न गृहमन्त्रालयले आग्रह गरेको हो ।

महावीर पुनजस्तो प्रतिष्ठित र सम्मानित व्यक्तिबाट कुनै गैरकानुनी कार्य नहुनेमा मन्त्रालय विश्वस्त रहेको पनि पत्रमा उल्लेख छ । यसरी विभूषण नै रद्द भएपछि पाउने व्यक्तिको नामसमेत रद्द गरेर सर्वसाधारणको जानकारीका लागि सूचना प्रकाशन हुने विषय पनि गृह मन्त्रालयले प्रष्ट पारेको छ ।