८ लाख ५० हजार घुससहित मालपोत हाकिम अख्तियारको नियन्त्रणमा

२४ असार २०७७ काठमाडौं । मालपोत कार्यालय डिल्लीबजारका प्रमुख गोविन्द अधिकारी घुससहित अख्तियार दुरुपयोग अनुसन्धान आयोगको नियन्त्रणमा छन् । डिल्लीबजार मालपोत कार्यालय अधिकृत रघुवंश कँडेल सहित ६ जना कर्मचारी ८ लाख ५० हजार घुस सहित रंगेहात समातिएका थिए ।

जग्गाको कित्ताकाट गर्ने आदेश गराईदिए बापत सेवाग्राहीसँग घुस लिएका उनीहरुको बयानकै आधारमा अधिकारीलाई नियन्त्रणमा लिएको हो । कर्मचारी पक्राउ परेपछि अधिकारीलाई डिल्लीबजार मालपोतबाट भूमि व्यवस्थापन तथा अभिलेख विभागमा काज फिर्ता गरिएको थियो ।

लकडाउन खुकुलो पार्ने निर्णयसँगै सामाखुसीको स्टार पार्टी प्यालेशबाट अधिकृत रघुवंश कँडेल, खरिदार दिपक खनाल, नासु उद्धव सापकोटा, नारायण प्रसाद पोखरेल, नवराज घिमिरे र गोपाल खड्कालाई अख्तियारले पक्राउ गरेको हो ।