- ५ असार २०८३, शुक्रबार / Jun 19, 2026
अर्घाखाँची, ३० असाेज । अर्घाखाँचीको छत्रदेव गाउँपालिका–१ सौरेखोलामा बुधबार राति दुईवटा मोटरसाइकल आपसमा ठोक्किँदा दुई जनाको मृत्यु भएको छ भने दुई जना गम्भीर घाइते भएका छन्।
लु ५८ प ७९७८ नम्बरको मोटरसाइकल र विपरीत दिशाबाट आउँदै गरेको लु ३३ प ६५४४ नम्बरको मोटरसाइकल ठोक्किँदा दुर्घटना भएको हो। मृत्यु हुनेमा अर्घाखाँची पाणिनी गाउँपालिका–५ का २१ वर्षीय तारा बेलबासे र गुल्मी छत्रकोट गाउँपालिका–६ का ३५ वर्षीय सुमन सुनार रहेका छन्। उनीहरु दुवै चालक हुन्।
घटनापछि उद्धार गरी जिल्ला अस्पताल सन्धीखर्क पुर्याइएकोमा उपचारका क्रममा पौने ११ बजे दुवैको मृत्यु भएको प्रहरीले जनाएको छ। घाइते हुनेमा अर्घाखाँची पाणिनीकी १८ वर्षीया दीपा कोइराला र गुल्मी छत्रकोटका ४४ वर्षीय सुरज सुनार रहेका छन्।
दुवैलाई थप उपचारका लागि लुम्बिनी प्रादेशिक अस्पताल र लुम्बिनी सिटी अस्पताल पठाइएको छ। उनिहरूको अवस्था गम्भीर रहेको प्रहरीले जनाएको छ। दुर्घटनाको कारण तीव्र गति भएको प्रहरीको प्रारम्भिक अनुमान छ।
