- २८ श्रावण २०८३, बिहीबार / Aug 13, 2026
काठमाडौं, असार २७ । काठमाडौंको बुद्धनगरमा आत्मदाहको प्रयास गरेका ४५ वर्षीय अश्विन राउतको उपचारका क्रममा निधन भएको छ।
वीर अस्पतालमा उपचाररत राउतको शनिबार केहीबेरअघि मृत्यु भएको अस्पतालका चिकित्सक डा. पियुष दाहालले जानकारी दिएका छन्।
प्रहरीका अनुसार राउतको आफ्नै छोरासँग पारिवारिक विवाद भएको थियो। सोही विवादपछि शनिबार बिहान उनले घरको भान्सामा गएर आफ्नै शरीरमा आगो लगाएको प्रारम्भिक अनुसन्धानबाट खुलेको छ।
अस्पतालका अनुसार घटनामा राउतको शरीरको करिब ५५ प्रतिशत भाग जलेको थियो। गम्भीर अवस्थामा उपचार भइरहेको भए पनि उनलाई बचाउन नसकिएको चिकित्सकहरूले बताएका छन्।
यसअघि त्रिपुरेश्वरमा आफ्नै शरीरमा आगो लगाएका गणेश नेपालीको पनि उपचारकै क्रममा शुक्रबार निधन भएको थियो।
पछिल्ला केही दिनयता राजधानीमा भएका यी दुई आत्मदाहका घटनाले मानसिक स्वास्थ्य, पारिवारिक तनाव र संकटमा परेका व्यक्तिहरूलाई समयमै सहयोग उपलब्ध गराउने विषयमा पुनः बहस सुरु भएको छ।
