- ३० श्रावण २०८३, शनिबार / Aug 15, 2026
बाजुरा, २९ साउन । बाजुराको हिमाली गाउँपालिका–१ बिच्छ्या खोलामा आएको बाढीले २ वटा घर पूर्णरुपमा पुर्दै ४ वटा घरमा आंशिक क्षति पुर्याएको छ। जिल्ला प्रहरी कार्यालय बाजुराका अनुसार हिजो बेलुकी करिब ६ बजे आएको बाढीले स्थानीय नरेन्द्र बुढाको पसल र सञ्चलाल थापाको घर पुरेको हो।
स्थानीय धनसिंह थापा, सब्बले थापा, लाल बहादुर थापा र गोताल थापाको घरमा आंशिक क्षति पुगेको छ भने सुजालाल थापाको शौचालय पनि बाढीले बगाएको प्रहरीले जनाएकाे छ ।
बाढीका कारण झोलुङ्गे पुल, बिच्छ्या मावि, वडा नं. १ कार्यालय भवनसहित १७ वटा सरकारी संरचना क्षतिग्रस्त भएका छन्। यस्तै १५ घर उच्च जोखिममा रहेको जनाइएको छ।
मानवीय क्षति नभएको बताउँदै प्रहरीले बिच्छ्या खोला र कुवाडी खोलाको आसपासका बासिन्दालाई सतर्क रहन आग्रह गरेको छ।
