- ११ जेष्ठ २०८३, सोमबार / May 25, 2026
भक्तपुर, २६ माघ । भक्तपुर जिल्लाका चार वटै नगरपालिकामा आजदेखि लक्षित समूहका किशोरीलाई विद्यालयमै पुगेर एचपीभी खोप दिइने भएको छ । जनस्वास्थ्य कार्यालय कटुञ्जे भक्तपुरले आइतबार पत्रकारहरूसँग अन्तरक्रिया गरी जिल्लाका चार नगरपालिकामा कक्षा ६ मा अध्ययनरत विद्यार्थी तथा विभिन्न उमेर समूहका लक्षित किशोरी–किशोरको तथ्यांक सार्वजनिक गरेको छ । कार्यालयका अनुसार जिल्लाभर कक्षा ६ मा अध्ययनरत विद्यार्थीको संख्या ३ हजार ८४९ पुगेको छ ।
यी सबै किशोरीलाई विद्यालयमै स्वास्थ्यकर्मी पुगेर खोप दिइने स्वास्थ्य कार्यालय प्रमुख अन्जना खड्काले जानकारी दिनुभयो । उहाँका अनुसार विगत वर्षदेखि सुरु भएको एचपीभी खोप अभियान यो वर्ष दोस्रो चरणमा पुगेको हो । आगामी वर्षदेखि छुटेकालाई खोप नदिइने भएकाले सबै किशोरीलाई अनिवार्य रूपमा खोप लगाउन आग्रह गरिएको छ । तथ्यांकअनुसार भक्तपुर नगरपालिकामा कक्षा ६ मा अध्ययनरत विद्यार्थीको संख्या सबैभन्दा बढी १ हजार ५१५ रहेको छ । यद्यपि यहाँ १० वर्ष उमेर समूह, कक्षा ७–१० छाडेका तथा ११–१४ वर्ष उमेर समूहका किशोरी–किशोरको संख्या शून्य देखिएको छ ।
यस्तै चाँगुनारायण नगरपालिकामा कक्षा ६ का विद्यार्थी ५२९ जना रहेका छन् भने १० वर्ष उमेर समूहका किशोरी–किशोर ६६ जना रहेका छन् । यहाँ पनि कक्षा ७–१० छाडेका तथा ११–१४ वर्ष उमेर समूहका किशोरी–किशोरको संख्या शून्य रहेको छ । जिल्लाभर समग्र रूपमा हेर्दा १० वर्ष उमेर समूहका किशोरी–किशोरको संख्या १६३ पुगेको छ । कक्षा ७–१० छाडेका विद्यार्थी ३० जना र ११–१४ वर्ष उमेर समूहका किशोरी–किशोर २० जना रहेको तथ्यांकले देखाएको छ ।
यो वर्ष माघ २६ गतेदेखि फागुन १ गतेसम्म विद्यालय केन्द्रित खोप अभियान सञ्चालन गरिने जनाइएको छ । यस अवधिमा छुटेका किशोरीलाई फागुन ४ र ५ गते स्वास्थ्य संस्था (चौकी) मार्फत खोप दिइने योजना रहेको स्वास्थ्य कार्यालयले जनाएको छ ।
