- ७ श्रावण २०८३, बिहीबार / Jul 23, 2026
भोजपुर, ८ वैशाख । भोजपुरमा जारी भोजपुर गोल्डकप अन्तर्गत सोमबार भएका खेलमा एपिएफ क्लब र आयोजक भोजपुर जिल्ला फुटबल सङ्घ सेमिफाइनलमा प्रवेश गरेका छन् । आइतबारदेखि सुरु प्रतियोगितामा हुरीबतास र वर्षाका कारण स्थगित भएको खेल सोमबार पुनः सञ्चालन गरिएको थियो ।
आइतबारको बाँकी खेलअन्तर्गत सोमबार भएको पहिलो खेलमा एपिएफले एलएक्स सिटी मोरङ लाई ३ – २ गोलले पराजित गर्दै अन्तिम चारमा स्थान बनाएको हो । एपिएफका लागि विकास तितुङ, मानबहादुर राना र हरि कार्कीले एक–एक गोल गरे । एलएक्स सिटीका विशाल तामाङ र पुजन चौधरीले एक–एक गोल फर्काए पनि टोलीलाई जित दिलाउन सकेनन् ।
त्यस्तै दोस्रो खेलमा आयोजक भोजपुर जिल्ला फुटबल सङ्घले सङ्खुवासभा–११ लाई २–१ गोलले हराउँदै सेमिफाइनल यात्रा तय गर्यो । भोजपुरका लागि विनोद राई र मिलन लिम्बूले गोल गरे भने सङ्खुवासभाका सूर्य राउतले एक गोल फर्काए ।
भोजपुर जिल्ला फुटबल सङ्घको आयोजनामा तथा भोजपुर नगरपालिकाको मुख्य प्रायोजनमा भोजपुर नगरपालिका–७ कोदारस्थित रङ्गशालामा प्रतियोगिता सञ्चालन भइरहेको छ । नवौँ संस्करणको प्रतियोगितामा एपिएफ क्लब, एलएक्स सिटी मोरङ, भोजपुर जिल्ला फुटबल सङ्घ, सङ्खुवासभा–११, सातदोबाटो युग क्लब ललितपुर, केपिलासगढी गाउँपालिका खोटाङ, प्लानिङ ब्वाइज युनाइटेड काठमाडौँ र द गोर्खाज फुटबल क्लब उदयपुर गरी आठ टोलीको सहभागिता रहेको छ ।
प्रतियोगिताका विजेताले पाँच लाख रुपैयाँ र उपविजेताले तीन लाख रुपैयाँ पुरस्कार प्राप्त गर्ने आयोजकले जनाएको छ । साथै उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई पनि विशेष पुरस्कारको व्यवस्था गरिएको छ ।
