तराईमा तातो लहरको जोखिम, मौसमविद्को सतर्कता अपनाउन आग्रह

काठमाडौं, ८ वैशाख । देशभर पश्चिमी तथा स्थानीय वायुको आंशिक प्रभाव कायम रहेको भन्दै मौसम पूर्वानुमान महाशाखाले तराई क्षेत्रमा अत्यधिक गर्मी र तातो हावा चल्ने सम्भावना रहेको जनाएको छ। विशेषगरी मधेस, लुम्बिनी र सुदूरपश्चिमका तराई क्षेत्रमा तातो लहरको जोखिम बढेको महाशाखाले उल्लेख गरेको छ।

हाल देशका हिमाली भूभागमा सामान्यदेखि आंशिक बदली रहेको छ। कोशी प्रदेश, बागमती प्रदेश र गण्डकी प्रदेश का पहाडी भूभागमा आंशिक बदली रहेको छ भने बाँकी अधिकांश भूभागमा मौसम मुख्यतया सफा रहेको महाशाखाले जनाएको छ।

आज दिउँसो देशका हिमाली भूभागमा सामान्य बदली रहनेछ। कोशी प्रदेशको पहाडी तथा तराई भूभागमा आंशिक बदली रहने अनुमान गरिएको छ भने बाँकी पहाडी क्षेत्रमा पनि आंशिक बदली रहनेछ। तराईका अधिकांश क्षेत्रमा भने मौसम मुख्यतया सफा रहनेछ।

महाशाखाका अनुसार हिमाली क्षेत्रका एक–दुई स्थानमा चट्याङसहित हल्कादेखि मध्यम वर्षाको सम्भावना रहेको छ। उच्च हिमाली भूभागमा हल्का हिमपात पनि हुन सक्नेछ।

विशेषगरी मधेस प्रदेश, बागमती प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेश का तराई क्षेत्र, उपत्यका र खोँचहरूमा अत्यधिक गर्मी हुने सम्भावना रहेको छ। विशेषगरी लुम्बिनी र सुदूरपश्चिमका तराई क्षेत्रमा तातो हावा तथा तातो लहर चल्न सक्ने भएकाले दिउँसोको समयमा बाहिर ननिस्कन, प्रशस्त पानी पिउन र आवश्यक सतर्कता अपनाउन आग्रह गरिएको छ।

आज राति पनि देशका हिमाली भूभागमा आंशिक बदली रहनेछ भने पहाडी तथा तराई क्षेत्रमा मौसम मुख्यतया सफा रहने अनुमान गरिएको छ। कोशी र गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना रहेको छ।