- ९ आश्विन २०८३, शुक्रबार / Sep 25, 2026
काठमाण्डौ । आइतबार तीन प्रदेशमा ठूलो पानी पर्ने सम्भावना रहेको छ । गण्डकी, लुम्बिनी र कर्णाली प्रदेशका धेरै ठाउँमा ठूलो पानी पर्ने सम्भावना रहेको मौसम पूर्वानुमान महाशाखाले जनाएको हो ।
देशका सबैजसो ठाउँमा सामान्यदेखि पूर्ण बदली रहेर धेरै ठाउँमा सामान्य वर्षाको सम्भावना छ । महाशाखाले अबको तीन दिनसम्म गण्डकी प्रदेशसहित पश्चिमका सबैजसो ठाउँमा पानी पर्ने अनुमान गरेको छ ।
मनसुनी वायुको प्रभावका कारण गए रातिदेखि नै पानी परिरहेको र दिउँसो गण्डकी, लुम्बिनी र कर्णाली प्रदेशका केही ठाउँमा अति ठूलो पानीसमेत पर्ने अनुमान रहेको महाशाखाले गरेको छ ।
सावधानी अपनाउन जल तथा मौसम विज्ञान विभागले अनुरोध गर्दै मनसुन सक्रिय भएदेखि नै लगातारजसो पानी परिरहेकोले अब पर्ने सामान्य पानीमा पनि बाढी, पहिरोलगायतका प्रकोपका घटना हुन सक्ने जनाएको छ ।
