- ३० चैत्र २०८२, सोमबार / Apr 13, 2026
काठमाडौँ, २७ पुष । चालू आर्थिक वर्षको करिब छ महिना बित्न लाग्दा पनि विकास बजेटको खर्च ११ प्रतिशतसम्म पनि पुग्न सकेको छैन ।
अर्थ मन्त्रालयका अनुसार सरकारले चालू आर्थिक वर्षका लागि ४ खर्ब रुपैयाँभन्दा बढीको पूँजीगत बजेट विनियोजन गरे पनि पुस २६ गतेसम्ममा जम्मा ४३ अर्ब ६० करोड रुपैयाँ मात्रै खर्च भएको छ । यो कुल विनियोजित बजेटको १० दशमलव ६९ प्रतिशत हो ।
गत आर्थिक वर्षको यही अवधिमा सरकारले विकास बजेटको १५ दशमलव २१ प्रतिशत अर्थात् ५३ अर्ब ५८ करोड रुपैयाँ खर्च गरेको थियो । अघिल्लो वर्षको तुलनामा यस वर्ष विकास खर्च अझै कमजोर देखिएको तथ्याङ्कले पुष्टि गर्छ ।
अर्थ मन्त्रालयका प्रवक्ता टङ्कप्रसाद पाण्डेयका अनुसार नवयुवा आन्दोलनका कारण प्रशासनिक संयन्त्र झन्डै एकदेखि डेढ महिना अलमलमा पर्दा विकास बजेट कार्यान्वयन प्रभावित भएको हो । “प्रशासनिक संयन्त्र सक्रिय नहुँदा बजेट खर्च प्रभावित भयो,” उनले भने, “तर मन्त्रालयले सम्बन्धित निकायलाई सहजीकरण गरिरहेको छ र अबका दिनमा विकास खर्चमा सुधार आउनेछ ।”
यस्तै, रुग्ण ठेक्का तोडिएका कारण पनि विकास खर्चमा तत्काल असर परेको मन्त्रालयको भनाइ छ । प्रवक्ता पाण्डेयले रुग्ण ठेक्का तोड्दा तत्काल खर्च घटे पनि दीर्घकालीन रूपमा विकास निर्माणलाई सकारात्मक असर पर्ने बताए ।
विकास खर्च न्यून हुनुमा निर्माण व्यवसायीले सरकारलाई र सरकारले निर्माण व्यवसायीलाई दोष दिँदै आएका छन् । तर दुवै पक्षबीच समन्वय अभाव, प्रशासनिक ढिलासुस्ती र अवरोधका कारण पूँजीगत खर्च लक्ष्यअनुसार अघि बढ्न नसकेको विश्लेषण गरिएको छ ।
