- २२ कार्तिक २०८३, आईतवार / Nov 8, 2026
काठमाडौँ, १७ कार्तिक । राहदानी विभागले दैनिक एक हजार थान राहदानी वितरण गरिने स्पष्ट पारेको छ। विभागले आइतबार साँझदेखि दैनिक (सार्वजनिक बिदाको दिन बाहेक) राहदानी उपलब्ध गराउने जनाएको हो।
विभागका अनुसार विद्युतीय राहदानी आपूर्तिका लागि नयाँ आपूर्तिकर्तासँग गत साउनमा खरिद सम्झौता गरिसकिएको छ। उक्त सम्झौताअनुसार आगामी फागुन ११ गतेदेखि राहदानी सेवा सुरु हुने गरी नयाँ पूर्वाधार तथा प्रणाली निर्माण भइरहेको आज जारी विज्ञप्तिमा उल्लेख गरिएको छ।
नयाँ आपूर्तिकर्ता र हालको आपूर्तिकर्ताबीच हुने सङ्क्रमणकालीन अवस्था (ह्यान्डओभर र टेकओभर) तथा राहदानी पुस्तिकाको सीमित सङ्ख्या र सेवाग्राहीको उच्च मागलगायतका कारण राहदानी वितरणमा केही समस्या भएको विभागले जनाएको छ।
विभागले राहदानीको अभाव नहोस् भन्ने उद्देश्यले आवश्यक पहल भइरहेको र अर्को सूचना नआएसम्म अत्यावश्यक सेवाग्राहीले मात्रै राहदानीका लागि आवेदन दिन आग्रह गरेको छ।
त्यसैगरी, राहदानीका विषयमा अनधिकृत व्यक्तिको भर नपर्न र त्यस्ता व्यक्तिबाट हुन सक्ने ठगीबाट सावधान रहन पनि विभागले सबैलाई सचेत गराएको छ।
