- २६ असार २०८३, शुक्रबार / Jul 10, 2026
काठमाडौँ । निर्वाचन आयोगले उम्मेदवार तथा राजनीतिक दलहरूले चुनाव प्रयोजनका लागि शुभेच्छुकहरूबाट स्वेच्छिक सहयोग लिन पाउने तर चन्दा उठाउन नपाउने स्पष्ट पारेको छ ।
आयोगका प्रवक्ता नारायणप्रसाद भट्टराईका अनुसार प्रचलित कानूनको परिधिभित्र रहेर चुनाव प्रचारप्रसारका लागि सहयोग सङ्कलन गर्न सकिनेछ । तर, उम्मेदवार वा राजनीतिक दलले कसैलाई पनि निश्चित रकम तोकेर चन्दा माग्न भने पाउने छैनन् ।
प्रवक्ता भट्टराईले उम्मेदवारले चुनाव प्रयोजनका लागि अनिवार्य रूपमा छुट्टै बैंक खाता खोल्नुपर्ने व्यवस्था रहेको उल्लेख गर्दै उक्त खातामा सङ्कलित रकम व्यक्तिगत प्रयोजनमा खर्च गर्न नपाइने प्रष्ट पार्नुभयो । उहाँले भन्नुभयो, “चुनावको प्रचारप्रसारका लागि उम्मेदवार वा दलले कसैलाई यति रकम दिनुपर्छ भनेर तोकेर माग्न पाइँदैन । तर, स्वेच्छाले सहयोग गर्न चाहनेले उम्मेदवारले चुनाव प्रयोजनका लागि खोलेको खातामा रकम जम्मा गर्न सक्नेछन् ।”
यसैबीच, निर्वाचन आयोगले चुनावका लागि आवश्यक मतपत्र छपाइ कार्यलाई तीव्रता दिएको जनाएको छ । प्रवक्ता भट्टराईका अनुसार हालसम्म ८४ लाख ४० हजार थान मतपत्र छपाइ सम्पन्न भइसकेको छ । छपाइ भएका मतपत्रमध्ये ७ हजार १ सय ३७ वटा बाकस प्याकिङ सम्पन्न भइसकेको आयोगले जनाएको छ ।
हालसम्म ३२ वटा जिल्लाका लागि आवश्यक मतपत्रको छपाइ र प्याकिङ कार्य पूर्णरूपमा सम्पन्न भएको छ । आयोगका अनुसार बाँकी जिल्लाहरूका लागि आवश्यक मतपत्र छपाइ र व्यवस्थापनको काम पनि युद्धस्तरमा भइरहेको छ ।
