गाँजा र तीन लाख नगदसहित युवती पक्राउ

झापा । चार केजी प्रतिबन्धित लागुऔषध गाँजासहित बुद्धशान्ति गाउँपालिका–३ बाट एक युवती पक्राउ परेकी छन् । २९ वर्षीया दुर्गा धिमाल पक्राउ परेकी हुन् । इलाका प्रहरी कार्यालयको टोलीले गए राति ११ः३० बजे धिमालको घरमा खानतलासी गर्दा चार केजी गाँजा, नगद रु तीन लाख छ हजार आठ सय ७० र भारु दुई हजार तीन सय बरामद गरेको हो ।

लागुऔषध कारोबार भइरहेको सूचनाका आधारमा प्रहरी टोली धिमालको घर पुगेको थियो । पक्राउ परेकी धिमाललाई धुलावारी इलाका प्रहरी कार्यालयमा राखिएको छ । घटनास्थलबाट गाँजा जोख्ने तराजु, ढक, लाइटर, प्याकेजिङ प्लास्टिक, चक्कु, कैची, अचानो र हथौडा बरामद भएको जिल्ला प्रहरी कार्यालयका सूचना अधिकारी कृष्णकुमार चन्दले बताए ।

झापामा लागुऔषध कारोबार गरेको अभियोगमा शनिबार एकैदिन पाँच जना विभिन्न स्थानबाट पक्राउ परेका छन् । पक्राउ पर्नेमा मेचीनगर–६ का ४१ वर्षीय रुपेश पाख्रिन र ३२ वर्षीय डिकबहादुर मगर, इलामको माङसेबुङ–४ का २४ वर्षीय रोदन लिम्बू र दमक–६ का २० वर्षीय नवीन ठटाल रहेको जिल्ला प्रहरी कार्यालयले जनाएको छ ।