- २६ भाद्र २०८३, शुक्रबार / Sep 11, 2026
काठमाडौं । भारतको कर्नाटक राज्यको बेंग्लुरुमा खाना पकाउने ग्यास लिक हुँदा ज्यान गुमाउने नेपालीको सङ्ख्या ५ जना पुगेको छ । घटनामा बझाङको जयपृथ्वी नगरपालिकाका–११ सुइलका एकै परिवारका पाँच जना जलेर घाइते भएका थिए ।
गएको बुधवार राति सबै परिवार कोठामै रहेका बेला खाना पकाउने क्रममा ग्याँस विस्फोट भएको थियो । घाइतेमध्ये ३२ वर्षीय मदन बोहोराको अस्ति आइतवार राति र उनकी छोरी ११ वर्षीया निताको हिजो बिहान ज्यान गएको हो । त्यसअघि उनकी श्रीमती ३० वर्षीया प्रेमजलाको शनिवार बेलुका ज्यान गएको थियो । मदनका आठ वर्षीया छोरी अनिता र साढे चार वर्षीय छोरा प्रशान्तको घटना भएकै दिन अघिल्लो बुधवार ज्यान गएको थियो । मदनको परिवार ६ वर्षदेखि भारतमा बस्दै आएको थियो ।
भारतका लागि नेपाली राजदूत शंकर शर्माले घटनाबारे राजदूतावासले स्थानीय प्रहरीसँग समन्वय गरेको र नेपालमा परिवारका सदस्यलाई खबर पठाइएको जानकारी दिए । परिवार सम्पर्कमा आएपछि क्षतिपूर्तिको सन्दर्भमा दूतावासले पहल गर्ने उनले बताए ।
