- ५ असार २०८३, शुक्रबार / Jun 19, 2026
गाजा, २५ साउन । इजरायली आक्रमण जारी रहेका गाजामा कुपोषणका कारण थप ११ जनाको मृत्यु भएको छ। गाजाको स्वास्थ्य मन्त्रालयका अनुसार हालसम्म कुपोषणका कारण मृत्यु हुनेहरूको संख्या २१२ पुगेको छ, जसमा ९८ जना बालबालिका रहेका छन्।
इजरायली सैन्य कारबाहीका कारण पछिल्लो २४ घण्टामा कम्तीमा ३८ जनाको मृत्यु र ४९१ जना घाइते भएका छन्, बीबीसीले मन्त्रालयलाई उद्धृत गर्दै जनाएका छन्।
यसैबीच, इजरायलले गाजालाई पूर्ण रूपमा नियन्त्रणमा लिने नयाँ योजना सार्वजनिक गरेको छ। यो योजना अनुसार गाजाका करिब १० लाख बासिन्दालाई दक्षिणतर्फ सारिने प्रस्ताव छ। तर, मानवअधिकार समूहहरू र विभिन्न देशहरूले यस योजनाको कडा विरोध गरेका छन्। उनीहरूले यसले गाजामा मानवीय संकट अझै विकराल हुने चेतावनी दिएका छन्।
संयुक्त राष्ट्रसंघले पनि गाजामा खाद्य संकट चरम अवस्थामा पुगेको जनाएको छ। पछिल्लो २४ घण्टामा खाद्यान्न लिन लाइनमा रहेका कम्तीमा २१ जनाको मृत्यु भएको छ।
इजरायलले आगामी ७ अक्टोबरपछि गाजालाई पूर्ण नियन्त्रणमा लिने योजना अनुसार थप कारबाही गर्ने तयारी गरेको छ। हालसम्म गाजामा झण्डै ६२ हजार मानिस मारिएका छन्।
