बेँसीसहर हुँदै हिमाली जिल्ला मनाङ जाने यात्रु समस्यामा

लमजुङ । डुम्रे–बेँसीसहर सडकखण्ड अवरुद्ध भएको छ । गए रातिदेखिको निरन्तर वर्षाले बेँसीसहर नगरपालिका–१ दलालमा लेदोसहितको पहिरो जाँदा बिहानदेखि सडक अवरुद्ध भएको हो ।

बेँसीसहरबाट काठमाडौँ, पोखरा, चितवनलगायतका स्थानमा जाने यात्रु र सो स्थानबाट बेँसीसहर र बेँसीसहर हुँदै हिमाली जिल्ला मनाङ जाने यात्रु समस्यामा परेका हुन् । बिरामी बोकेको एम्बुलेन्ससमेत रोकिएका छन् । डुम्रे–बेँसीसहर ४२ किलोमिटर रहेको छ ।

यस वर्ष यो सडक पहिलोपटक अवरुद्ध भएको हो । जिल्ला प्रहरी कार्यालय लमजुङले सडक खुलाउन प्रहरी टोली परिचालन भए पनि पानी निरन्तर परिरहेकाले समस्या भएको जानाएको छ । सडक अवरुद्ध हुँदा सवारीसाधन तथा यात्रु अलपत्र परेका छन् ।