कोरिया जान सन् २०२४ को फर्म खुला गर्नुपर्ने लगायतका माग सहित पाँच दिनदेखि विद्यार्थीको प्रदर्शन

काठमाण्डौ । पाँच दिनदेखि ईपीएस शाखा कार्यालयमा प्रदर्शन भएको छ । ललितपुरको ग्वार्कोमा रहेको ईपीएस शाखा कार्यालयमा सीप बिल्डिङतर्फको परीक्षामा अनुत्तीर्ण विद्यार्थीलाई अन्याय भएको भन्दै पाँचदिन देखि विद्यार्थीहरूले प्रदर्शन गरेका हुन् । उनीहरुले मेनुफेक्चर अर्थात् औद्योगिकतर्फ लिइएको परीक्षामा आफूहरुलाई अनुतीर्ण गरेको भन्दै प्रदर्शन गरेका हुन ।

ईपीएस शाखा कार्यालयले परीक्षार्थीलाई धर्ना, जुलुस जस्ता कार्यक्रम तत्काल बन्द गर्न अनुरोध गरेको छ । विद्यार्थीका मागका विषयमा कोरिया सरकारसँग छलफल भइरहेको कार्यालयले जनाएको छ । नेपालमा रहेको दक्षिण कोरियाको सम्पर्क कार्यालय एचआरडी सर्भिस अफ कोरिया, ईपीएस सेन्टर नेपाल र अन्य सम्बन्धित निकायसँग छलफल भइरहेको र निष्कर्षमा पुग्न केही समय लाग्ने भएकाले धर्ना, जुलुस जस्ता विरोधका कार्यक्रम रोक्न कार्यालयले आग्रह गरेको छ ।

ईपीएस प्रणाली अन्तर्गत एक विद्यार्थीले वर्षमा एक पटकमात्रै परीक्षा दिन पाइन्छ । यसअघि सीप बिल्डिङको परीक्षा दिएकामध्ये ४ हजार उत्तीर्ण भएका थिए भने २८ हजार अनुत्तीर्ण भएका थिए । तर ईपीएस शाखाले भाषा परीक्षा डिसेम्बरमै खोलेपछि ती अनुत्तीर्ण भएका २८ हजार विद्यार्थीले परीक्षा दिन नपाउने भएका छन् । उनीहरूले सीप बिल्डिङमा फेल भएकाले फर्म भर्न पाउनुपर्ने, सन् २०२४ को फर्म खुला गर्नुपर्ने लगायतका माग गर्दै प्रदर्शन थालेका हुन् ।