चीनको पूर्वी क्षेत्र शानडोङ प्रान्तको राजधानी जिनानमा हिमपातका कारण जनजीवन प्रभावित

एजेन्सीँ । चीनको पूर्वी क्षेत्र शानडोङ प्रान्तको राजधानी जिनानमा बालबालिकाहरुलाई अनलाइन माध्यमबाट पढाउन थालिएको छ । सोमबार बिहानैदेखि शुरु भएको हिमपातका कारण उनीहरुलाई अनलाइन माध्यमबाट पढाउन थालिएको हो ।

विद्यार्थीहरूलाई सुरक्षित पठनपाठनका लागि शिक्षकहरूलाई तालिम दिँदै विद्यालयको खेल मैदानमा हिउँ हटाउन समन्वय भइरहेको पनि जिनानको शिक्षा विभागले जनाएको छ । हिमपातका कारण जिनानको जनजीवन प्रभावित भएको छ ।

हिमपातसँगै हावाहुरी चल्न थालेपछि प्राथमिक र माध्यमिक विद्यालयका साथै शिशु कक्षाहरू अनलाइनमार्फत सञ्चालन गरिएको हो । चीनको राजधानी बेइजिङमा पनि हिमपातका कारण जनजीवन प्रभावित भएको छ ।

यातायात अवरुद्ध भएको छ । सडकहरुमा बाक्लो हिउँ जमेको छ । प्रतिकूल मौसमका कारण केही हवाई उडान स्थगित भएको जनाइएको छ । जिनानको शिक्षा विभागले अनलाइन कक्षा सञ्चालन गर्न निर्देशन जारी गर्दै विद्यालयको पठनपाठन अवरुद्ध हुन नहुने जनाएको चिनियाँ सञ्चार माध्यमले जनाएका छन् ।