- १२ जेष्ठ २०८३, मंगलवार / May 26, 2026
पाँचथर । एक व्यक्तिले एक तोला सुन निलेका छन् । चोरी गर्न गएका फिदिम नगरपालिका–१ का २८ वर्षीय सुरेन्द्र योङ्याले सुन निलेका हुन् । उक्त सुन निलेको ३६ घण्टापछि दिसाबाट बाहिर निकालिएको हो । योङ्या गत चैत २८ गते योङ्या फिदिम–२ की विष्णुकुमारी तामाङको घरमा चोरी गर्न पसेका थिए ।
परिवारका सदस्यले योङ्याले सुनका गरगहना भएको स्टिलको दराजबाट सामग्री निकाल्दै गरेको देखेपछि प्रहरीलाई खबर गरेका थिए । प्रहरी टोलीले उनलाई नियन्त्रणमा लिएर अनुसन्धान गर्दा योङ्याको साथबाट रु १५ हजार नगद बरामद गरिएको थियो । गरगहनामध्ये एक तोलाको सुन फेला परेन ।
चोरी गर्न गएका योङ्याले उक्त सुन निलेको आशङ्कापछि जिल्ला अस्पताल फिदिममा एक्स–रे गरिएको थियो । एक्स–रे गर्दा योङ्याको पेटमा धातु देखिएको थियो । करिब ३६ घण्टापछि दिसाबाट उक्त सुन निकालिएको जिल्ला प्रहरी कार्यालय पाँचथरका सूचना अधिकारी सुमित कुशवाहाले बताए ।
सुन प्रहरीले फिदिमकै सुनचाँदी पसलमा परीक्षण गराएको थियो । चोरीसम्बन्धी सबै अनुसन्धान पूरा गरी जिल्ला प्रहरी कार्यालय पाँचथरले योङ्याविरुद्ध जिल्ला अदालत पाँचथरमा मुद्दा दायर गरेको थियो ।
जिल्ला अदालतले गत वैशाख २३ गते प्रतिवादी योङ्यालाई रु एक लाख ५० हजार धरौटीमा रिहा गर्ने आदेश दिएको थियो । धरौटी रकम जम्मा गर्न नसपछि उनलाई पुर्पक्षका लागि कारागार थुनामा पठाइएको सूचना अधिकारी कुशवाहाले बताए ।
