सुन प्रतितोला एक लाख ६१ हजार दुई सय रुपैयाँमा कारोबार

काठमाण्डौ । शुक्रबार सुन तोलामा पाँच सय रुपैयाँले बढेर अहिलेसम्मकै महँगो भएको छ । यो हप्ता तोलामै दुई हजार चार सय रुपैयाँले सुन बढेको छ । गएको आइतवारदेखि लगातार कीर्तिमान कायम गर्दै आएको छ ।

गएको आइतवार सुनको भाउ तोलाको एक लाख ५८ हजार आठ सय रुपैयाँ थियो । आइतवार एकैदिन तोलामा एक हजार सात सय रुपैयाँले बढेर सुनको भाउले कीर्तिमान बनाएको थियो । त्यसअघि शुक्रवार सुनको भाउ तोलाको एक लाख ५७ हजार एक सय रुपैयाँ रहेको थियो ।

अन्तर्राष्ट्रिय बजारमा भएको वृद्धिको प्रभाव स्थानीय बजारमा पर्दा सुनको मूल्यमा नयाँ कीर्तिमान कायम भएको नेपाल सुनचाँदी व्यवसायी महासङ्घले जनाएको छ । शुक्रबार अहिलेसम्मकै उच्च भाउ हुँदा सुन प्रतितोला एक लाख ६१ हजार दुई सय रुपैयाँमा कारोबार भइरहेको छ ।

चाँदीको भाउ भने अस्ति, हिजो र आज यथावत् रहेको छ । चाँदी आज तोलाको एक हजार नौ सय ५५ रुपैयाँमा कारोबार भइरहेको छ ।
त्यस्तै गएको भदौ ३१ गते सुनको भाउ तोलाको एक लाख ५७ हजार तीन सय रुपैयाँ थियो । असोज ७ गते सोमवार सुनले नयाँ कीर्तिमान बनाउँदा तोलाको एक लाख ५९ हजार दुई सय रुपैयाँ थियो ।