बाढी र पहिरोले गुल्मीको रिडी–वामीटक्सार सडक पूर्ण अवरुद्ध

गुल्मी, २३ साउन । गुल्मीको रिडी–वामीटक्सार सडक खण्डअन्तर्गत सत्यवती गाउँपालिका–६ डहरे खोलामा पानीको बहाव बढेपछि आज बिहानदेखि सडक पूर्णरूपमा अवरुद्ध भएको छ।

सडक माथिबाट लेदो सहितको बाढी आएपछि रिडी हुँदै बाग्लुङको बुर्तिबाङसम्म जाने सवारी बीचमै रोकिएका छन्। साथै, सुक्खा पहिरोका कारण रिडी–खर्ज्याङ सडक पनि प्रभावित भएको छ।

लगातार वर्षाका कारण कालीगण्डकी र बडिगाड खोलामा पानीको बहाव बढ्दै गएको छ। जिल्ला प्रशासन कार्यालय गुल्मीले बर्खाको समयमा खोलातटीय क्षेत्रमा बसोबास गर्ने बासिन्दालाई सतर्क रहँदै सुरक्षित स्थानमा बस्न आग्रह गरेको छ।