- २८ श्रावण २०८३, बिहीबार / Aug 13, 2026
काठमाडौं, ७ साउन । देशभर मनसुनी वायुको प्रभाव कायम रहेकाले आज पहाडी क्षेत्रका एक/दुई स्थानमा भारी वर्षाको सम्भावना रहेको छ । मौसम पूर्वानुमान महाशाखाले आवश्यक सतर्कता अपनाउन सर्वसाधारणलाई आग्रह गरेको छ ।
महाशाखाका अनुसार अहिले बिहान गण्डकी, लुम्बिनी, कर्णाली र सुदूरपश्चिम प्रदेशका साथै कोशी र बागमती प्रदेशका पहाडी तथा हिमाली क्षेत्रमा सामान्यदेखि पूर्ण बदली रहेको छ । मधेस र कोशी प्रदेशको तराई क्षेत्रमा पनि आंशिक बदली रहेको छ ।
दिउँसो देशका पहाडी तथा तराई क्षेत्रका केही स्थानमा मेघगर्जन र चट्याङसहित मध्यम वर्षाको सम्भावना रहेको छ । विशेषगरी कोशी, बागमती, गण्डकी, लुम्बिनी र कर्णाली प्रदेशका पहाडी क्षेत्रका एक/दुई स्थानमा भारी वर्षा हुन सक्ने महाशाखाले जनाएको छ ।
आज राति पनि पहाडी क्षेत्रका केही तथा तराईका थोरै स्थानमा मेघगर्जनसहित मध्यम वर्षा हुने सम्भावना छ । बागमती र गण्डकी प्रदेशका पहाडी तथा तराई क्षेत्रका एक/दुई स्थानमा भारी वर्षा हुन सक्ने भएकाले नदी, खोलानाला आसपासका बासिन्दा तथा यात्रुहरूलाई विशेष सावधानी अपनाउन मौसमविद्ले आग्रह गरेका छन् ।
